ՆՅՈՒՄԵՐՈԼՈԳԻԱ՞, ՏԱՐՈԼՈԳԻԱ՞, ԹԵ՞ ԲԱԽՏԱԳՈՒՇԱԿՈՒԹՅՈՒՆ

Նյումերոլոգիան, տարոլոգիան և ավանդական բախտագուշակությունը կիրառում են տարբեր մեթոդներ, բայց դրանց հիմքում ընդհանուր գաղափարն է՝ մարդու կյանքի, բնավորության կամ ապագայի մասին եզրակացություններ անել գիտականորեն չապացուցված մեթոդներով։

Բախտագուշակությունն ավելի հին ավանդույթ է և տարբեր ժամանակներում օգտագործել է տարբեր գործիքներ՝ քարտեր, սուրճի բաժակ, ձեռքի գծեր, աստղեր և այլ խորհրդանշական համակարգեր։
Տարոլոգիան օգտագործում է քարտեր և դրանց խորհրդանշական մեկնաբանությունները։

Նյումերոլոգիան նույն գաղափարը ներկայացնում է ավելի համակարգված և «հաշվարկային» ձևով՝ ծննդյան ամսաթվից, անունից կամ այլ թվերից ստանալով որոշակի թվեր և դրանց վերագրելով մարդու բնավորության կամ կյանքի վերաբերյալ նշանակություններ։

Օրինակ՝ մարդը ծնվել է 1985 թվականի մայիսի 23-ին։ Թվերը գումարում և կրճատում են մինչև որոշակի թիվ, ապա ստացված թիվը մեկնաբանում են որպես մարդու բնավորության ցուցիչ, օրինակ՝

1 — առաջնորդող
2 — զգայուն, համագործակցող
3 — ստեղծագործ
4 — կարգապահ
5 — ազատասեր
և այլն։

Նյումերոլոգը կարող է չհամարել իրեն «բախտագուշակ» և իր գործունեությունը ներկայացնել որպես թվերի մեկնաբանություն։ Սակայն բավարար գիտական ապացույց չկա, որ ծննդյան ամսաթվի կամ անվան թվերը կարող են որոշել մարդու բնավորությունը։ Այդ պատճառով նյումերոլոգիան գիտական հոգեբանության մեթոդ չի համարվում և ոչ այլ ինչ է, քան գուշակության արդի հերթական ճյուղերից մեկը։ Հարց է առաջանում․

ԻՆՉՈ՞Ւ ԵՆ ՄԱՐԴԻԿ ՀԱՎԱՏՈՒՄ ԳՈՒՇԱԿՈՒԹՅՈՒՆՆԵՐԻՆ

1. ԱՆՈՐՈՇՈՒԹՅՈՒՆԸ ՆՎԱԶԵՑՆԵԼՈՒ ՑԱՆԿՈՒԹՅՈՒՆ
Երբ մարդը չգիտի՝ ինչ է լինելու իր կյանքում, այդժամ պատրաստի պատասխան ստանալը կարող է ժամանակավորապես հանգստացնել նրան։

2. ՎԵՐԱՀՍԿՈՂՈՒԹՅԱՆ ՊԱՏՐԱՆՔ
Գուշակության համակարգերը կարող են ստեղծել ապագան հասկանալու և վերահսկելու զգացողություն, թեև այդ զգացողությունը չի նշանակում, որ մարդն իրականում վերահսկում է ապագան։

3. ԷՄՈՑԻՈՆԱԼ ԱԶԴԵՑՈՒԹՅՈՒՆ
Գուշակությունները հաճախ վերաբերում են մարդու ամենազգայուն թեմաներին՝ սեր, փող, ընտանիք, հաջողություն, կորուստ և ապագա։ Այդ պատճառով մարդը կարող է ավելի հեշտ ընդունել լսածը։

4. ԸՆԴՀԱՆՈՒՐ ՆԿԱՐԱԳՐՈՒԹՅՈՒՆՆԵՐԸ ԱՆՁՆԱԿԱՆ ԵՆ ԹՎՈՒՄ
Այստեղ գործում է Բարնումի էֆեկտը․ մարդիկ հաճախ ընդհանուր և լայն ձևակերպումները ընկալում են որպես իրենց անհատական ու ճշգրիտ նկարագրություն։

Օրինակ՝
«Դու ուժեղ ես, բայց երբեմն կասկածում ես ինքդ քեզ վրա»։
«Քո կյանքում փոփոխությունների շրջան է»։
«Դու մարդկանց հետ շփվող ես, բայց երբեմն քեզ պետք է մենակ մնալ»։

Այսպիսի ձևակերպումները կարող են համապատասխանել մեծ թվով մարդկանց։ Մարդը, սակայն, հաճախ առանձնացնում է իր կյանքին համընկած հատվածները և քիչ ուշադրություն դարձնում չհամընկածներին։

5. ԴԺՎԱՐ ԻՐԱՎԻՃԱԿՆԵՐՈՒՄ ԽՈՑԵԼԻՈՒԹՅԱՆ ԱՃ
Կորուստը, հարաբերությունների խնդիրները, ֆինանսական դժվարությունները կամ ապագայի նկատմամբ վախը կարող են մարդուն ավելի պատրաստ դարձնել արտաքին «պատասխաններ» փնտրելու։

ՈՎՔԵ՞Ր ԵՆ ԱՎԵԼԻ ՀԱԿՎԱԾ ՀԱՎԱՏԱԼՈՒ

Գուշակությունների նկատմամբ հակվածությունը կարող է մեծանալ, երբ մարդը գտնվում է բարձր էմոցիոնալ վիճակում։ Միաժամանակ սխալ կլինի բոլոր հավատացողների մասին նույն կերպ դատել։ Սակայն կարևոր է տարբերել, թե ինչպես է մարդը գնահատում տեղեկատվությունը։

Մարդը որքան շատ է սովոր իրադարձությունները քննել, տարբեր վարկածներ համեմատել և փնտրել ստուգելի փաստեր, այնքան ավելի դժվար է նրան համոզել չապացուցված պնդումներով։

Ինքնավստահ մարդը, որը պատրաստ է պատասխանատվություն կրել սեփական որոշումների համար, իր կյանքի կարևոր հարցերի պատասխանները սովորաբար չի կառուցում պատահական թվերի կամ գուշակությունների վրա։

Այսինքն՝ խնդիրը ոչ թե այն է, մարդը «խելացի՞ է, թե՞ հիմար», այլ այն, թե արդյոք նա իր կյանքի ղեկը պահում է իր ձեռքում, թե՞ պատրաստ է այն հանձնել չապացուցված համակարգերի։

ԱՄՓՈՓԵՆՔ
Նյումերոլոգիան, տարոլոգիան և բախտագուշակության այլ ձևերը տարբեր են իրենց գործիքներով, բայց դրանք միևնույն երևույթի տարբեր դրսևորումներ են՝ մարդու կամ նրա ապագայի վերաբերյալ չապացուցված եղանակով եզրակացություններ անելու փորձեր։

Մեկը դա անում է քարտերով կամ բաժակով, մյուսը՝ թվերով ու հաշվարկներով։ Բայց թվերի վրա հաշվարկ կատարելը մեթոդին գիտականություն չի հաղորդում։

Գուշակությունը ապագան չի բացահայտում։ Իսկ թվերը մարդու ճակատագիրը չեն որոշում։

Երբ մարդը փաստերի և սեփական փորձի հիման վրա վերլուծելու ու որոշումներ կայացնելու փոխարեն պատրաստի պատասխաններ է փնտրում գուշակության մեջ, նա կարող է ոչ թե լուծել իր անորոշությունը, այլ պարզապես ծածկել այն գեղեցիկ պատմությամբ։

Այս թեմայով 3 հարց․
1․ Ինչո՞ւ են գուշակների մոտ ավելի շատ այցելում, քան հոգեբանների։
2․ Ինչպե՞ս են խաբում ու մոլորեցնում մարդկանց գուշակները։
3․ Ի՞նչ են խոստանում հոգեբաններն ու գուշակները մարդկանց։

Այս հարցերի պատասխանները կստանաք իմ Youtube-յան փոդքաստից, որը կարող եք դիտել ԱՅՍՏԵՂ